Амма нэһилиэгэ төрүттэммитэ 100 сылыгар аналлаах үбүлүөйдээх ыһыахха нэһилиэккэ үөрэҕирии сайдыытыгар сүҥкэн үтүөлээх, Малышевтар учууталлар династияларын тутаах киһитэ, Российскай Федерация үтүөлээх учуутала, Саха Республикатын үтүөлээх учуутала, Таатта улууһун, Амма нэһилиэгин Бочуоттаах олохтоохторо Малышев Леонид Николаевич 75 сааһыгар анаан тахсыбыт "Устар үйэ тухары" буруолуу сылдьар 3 кинигэни Малышевтар дьиэ кэргэн аатыттан педагогическай үлэ ветерана, СР үөрэҕириитин туйгуна, Учууталлар учууталлара Зоя Афанасьевна Малышева библиотекаҕа бэлэх уунна. Манна даҕатан эттэххэ, Зоя Афанасьевна үбүлүөйдээх 100 сылынан уопсайа 100- н тахса кинигэни нэһилиэгин дьонугар- сэргэтигэр бэлэх уунарын иһитиннэрдэ.
Кинигэни кыыстара Вера Леонидовна хомуйан, Е.С. Иринцеева-Огдо редакциялаан оҥорбуттар. Кинигэ Дьокуускай куоракка Троев Ю.А. издательствотыгар бэчээттэнэн тахсыбыт. Үс бастан турар кинигэ аан тылын педагогическай наука кандидата, Таатта улууһун Аҕа баһылыгын социальнай политикаҕа солбуйааччы И.А.Сивцева суруйбут. Олус тупсаҕай оҥоһуулаах кинигэҕэ Леонид Николаевич үөлээннээхтэрин, бииргэ үлэлээбит коллегаларын, доҕотторун, аймах- билэ дьонун истиҥ-иһирэх ахтыылара киирбиттэр.
Леонид Николаевич төрөөбүт Чычымаҕар 30- н тахса сыл үлэлээбититтэн 30 сылын директордаабыта, билигин бочуоттаах сынньалаҥҥа олорор.
Үйэлэргэ умнуллубат үтүө бэлэх буоллун диэн баҕа санаалаах биэрбит кинигэлэргит иһин улахан махталбытын тиэрдэбит. Дьоҥҥо- сэргэҕэ, кэнчээри ыччакка холобур буолан өссө да өр сылларга чэгиэн туруктаах, үөрэ- көтө, дьоллоохтук- соргулаахтык олороргутугар баҕарабыт!
Comments