Ахсынньы 22 күнүгэр С.Р.Кулачиков-Эллэй аатынан Чычымах орто оскуолатыгар "Эллэй аатын үрдүктүк сүгэн.." диэн буруолуу сылдьар кинигэ биһирэмэ буолла. Биһирэми оскуола иитэр -үөрэтэр үлэҕэ директоры солбкйааччыта Т.С. Григорьева, оскуола библиотекара Прокопьева С.А. иилээн - саҕалаан ыыттылар.
Олус тупсаҕай оҥоһуулаах, сонун кинигэни олохтоох оскуола учууталлара Д.Е. Иванова, Ф.А. Андросова, Л.В. Прокопьева хомуйан оҥорбуттар. Саха бастакы норуодунай суруйааччыта Эллэйгэ аналлаах кинигэ 7 бастан турар:
I - С.Р. Кулачиков -Эллэй туһунан ахтыылар
II - "Туйаара" уһуйаан Эллэйгэ анаабыт үлэтэ
III - Эллэйгэ аналлаах уруоктар, кылаас таһынан тэрээһиннэр
IV - Үөрэнээччилэр, учууталлар дакылааттара
V - Оҕолор айымньылара
VI - Эллэй туһунан иһирэх тыллар
VII- Эллэй аатын үйэтитиигэ ыытыллар үлэлэр.
Олус тупсаҕай, дириҥ ис хоһоонноох кинигэ "Дани-Алмас"компания " ХЭТ 120 ахсаанынан бэчээттэнэн тахсыбыт. Кинигэҕэ сахалыы, нууччалыы, английскайдыы тылынан суруллубут ыстатыйалар, ахтыылар, хоһооннор, үөрэнээччилэр, учууталлар дакылааттара киирбиттэр. Кинигэҕэ QR кодунан видеолары, хаартыскалары көрөр гына оҥоһуллубут. Кинигэ биһирэмигэр күндү ыалдьыт буолан Серафим Романович төрөппүт кыыһа Наталья Серафимовна Дьокуускай куораттан айаннаан кэллэ. Олус үөрэн, долгуйан туран махтанан тыл эттэ. Кинигэни П.Д.Рахлеев директордаах "Төлөн" ОАО , Эллэй аймахтара, оскуола үлэһиттэрэ үбүлээннэр күн сирин көрбүт.
Кинигэни оҥорон таһаарбыт айар бөлөххө, оскуола коллективыгар күндү бэлэххит иһин махтанабыт. Ситиһиилэри, үйэтитиигэ үлэлэһэр үтүө дьыалаҕыт салҕана, сириэдийэ турарыгар баҕарабыт.