Үбүлүөйдээх сыл үөрүүтэ

Нэһилиэкпит үбүлүөйдээх сылын биир дьоһун бэлэҕинэн өр сылларга библиотека сэбиэдиссэйинэн ситиһиилээхтик үлэлээбит үлэ, тыыл ветерана, СӨ норуотун уус- уран оҥоһуктарын маастара, Амма нэһилиэгин Бочуоттаах олохтооҕо Агафья Петровна Кулаковская сырдык аатын библиотекаҕа иҥэрии буолла. Тохсунньу 14 күнүгэр А.П.Кулаковская аата библиотекаҕа иҥэриллибитин туоһулуур бэлиэни арыйыыга Агафья Петровна оҕолоро Еремей Наумович, Октябрина Наумовна, кийиитэ Тамара Павловна, сиэнэ Наум Еремеевич Малышевтар күндү ыалдьыт буолан кэллилэр. Ийэлэрин сырдык аата үйэтитиллибититтэн үөрэн туран махтал тылларын эттилэр. Нэһилиэк элбэх талааннаах дьонноро уонна үүнэр көлүөнэ өбүгэлэрин иискэ-ууска дьарыгын умнубатыннар, үөрэттиннэр, туһанныннар, үтүктэн оҥордуннар диэн Агафья Петровна кэргэнэ Наум Еремеевич, оҕолоро, сиэннэрэ анаан толкуйдаан, көрдөөн булан "Материальная и духовная культура народов Якутии в музеях мира (XVII-начало XX века" икки томнаах дьоһун кинигэни бэлэх ууннулар.

Дьоро күн биир долгутуулаах түгэнинэн баһылык С.С.Соров Еремей Наумовичка "Амма нэһилиэгин Бочуоттаах олохтооҕо" анал бэлиэни туттарыыта буолла.

Бу күн Агафья Петровнаны кытта чугастык алтыспыт аймах- билэ чугас дьоно кэлэннэр ытыктыыр киһилэрин иһирэх тылларынан ахтан- санаан аастылар.

Агафья Петровна үлэтигэр олус бэриниилээхтик үлэлээбитэ. Кини уһуйбут элбэх ааҕааччылара билигин махталынан ахталлар.

Сүрүн үлэтин таһынан элбэх общественнай үлэнэн дьарыктаммыта. Партия чилиэнэ, "Знание" общество чилиэнэ, агитатор, " Восток" зона начальнига о.д.а. элбэх дуоһунаһы тэҥҥэ тутан, барыларыгар олус таһаарыылаахтык, эппиэтинэстээхтик үлэлээн дьон убаастабылын ылыан ылара.

Киһи быһыытынан сэмэй, үөрүнньэҥ майгылааҕа. Дьоҥҥо наар үчүгэйи баҕарар, сүбэ- ама, күүс- көмө буолара. Сатаабыллаах хаһаайка этэ. Иис бары көрүҥүн дэгиттэр баһылаабыт талба талааннаах иистэнньэҥ. Элбэх көлүөнэ дьиэ хаһаайкаларын иис кистэлэҥнэригэр уһуйбута, үөрэппитэ. Көрдөспүт дьоҥҥо барытыгар буор босхо иистэнэрэ. Этэрбэһиттэн, бэргэһэтиттэн саҕалаан саха таҥаһыгар, үтүлүгэр тиийэ. Кэргэнинээн Наум Еремеевичтиин олус эйэлээхтик 60 сыл олорбуттара. Наум Еремеевич билигин Ытык Күөлгэ кыыһыгар олорор.

Агафья Петровна Кулаковская олорон ааспыт олоҕо, үлэтэ-хамнаһа барыбытыгар холобур буолар. Библиотекаҕа Агафья Петровна аатын иҥэрии нэһилиэк элбэх олохтооҕун баҕа санаата этэ. Ол бу үбүлүөйдээх сылга олоххо киирэн үйэтитиллибититтэн олохтоохтор бары олус үөрэбит, астынабыт.