Амма нэһилиэгэ төрүттэммитэ 100 сылыгар анаммыт үрүҥ тунах ыһыах үөрүүлээх түһүлгэтигэр биир дойдулаахтарбыт, кэргэннии Луиза Саввична Протопопова , Вячеслав Иванович Кулачиков Өксөкүлээх Өлөксөй "Сайын кэлиитэ" поэматынан оҕолорго анаан саҥа тахсыбыт кинигэлэри, уопсайа 63 экземпляры, бэлэх ууннулар. Бу кинигэ Саха литературатын төрүттээччи А.И.Кулаковскай-Өксөкүлээх Өлөксөй аатын үйэтитиигэ аналлаах социальнай бырайыак чэрчитинэн оҥоһуллубут.
Кинигэлэр саха, нуучча тылларынан "Дани-Алмас" компания типографиятыгар 2021 с. Президент Гранын фондатын, Протопопова Луиза Саввична өйөбүлүнэн тахсыбыттар. Бэчээккэ бэлэмнээбит Галина Алексеевна Бочкарева.
Приход лета" диэн нууччалыы вариана Евдокия Иринцеева-Огдо көҥүл тылбааһынан бэчээттэммит.
Кинигэ ойууларын биир дойдулаахпыт, норуот маастара, эмчит В. И. Кулачиков оҥорбут. Вячеслав Иванович билигин төрөөбүт Чычымаҕар кэрэ Амма кытылыгар Өксөкүлээх Өлөксөй айымньыларынан скульптуралары оҥоро сылдьар. Бырайыак автора уонна салайааччыта -кэргэнэ Луиза Саввична. Үлэ Президент гранын фондатыттан үбүлэнэр. Вячеслав Иванович үбүлүөйдээх ыһыах ытык сэргэтин оҥордо. Киниэхэ бу үөрүүлээх күҥҥэ "Амма нэһилиэгин сайдыытыгар тус кылаатын иһин" анал бэлиэ туттарылынна.
Нэһилиэккит оҕолоругар ууммут күндү бэлэххит иһин ис сүрэхпититтэн махтанабыт! Үйэтитиигэ үлэлиир үтүө дьыалаҕыт сайдан, сириэдийэн истин, бар дьоҥҥут махтала үрдүккэ кынаттаатын, дьол- соргу аргыстанан этэҥҥэ сылдьыҥ!
Comments