(1928-2015)
Ааҕар балаҕантан саҕыллан тэриллибит Чычымах библиотекатын бастакы сэбиэдиссэйинэн Кулаковская Агафья Петровна буолар . Кини Чычымах библиотекатыгар 1957 сылтан 1978 с. Бочуоттаах сынньалаҥҥа барыар дылы үтүө суобастаахтык үлэлээбит. Үлэ, тыыл ветерана. Өр сыллаах сыралаах үлэтэ "Коммунистическай үлэ удаарынньыга" бэлиэнэн, ССРС Киин комитетын профсоюһуттан, САССР культуратын министерствотыттан Бочуотунай грамоталарынан, Райком, Райсовет, совхоз, нэһилиэк салалталарын элбэх ахсааннаах Бочуотунай грамоталарынан сыаналаммыта. Партия чилиэнэ, сүрүн үлэтин таһынан общественнай үлэнэн күүскэ дьарыктанара, бастыҥ агитатор, пропагандист этэ. Элбэх көлүөнэ дьиэ хаһаайкаларын иис кистэлэҥнэригэр уһуйбута, көрдөспүккэ барытыгар араас таҥаһы барытын тигэн биэрэрэ. Иис бары көрүҥүн дэгиттэр баһылаабыт иистэнньэҥ этэ. Араас быыстапкаларга ситиһиилээхтик кыттара. Уран тарбахтаах иистэнньэҥ "СӨ норуотун маастара" буолбута . Сатаабатаҕа суох, дьонугар- сэргэтигэр холобур буолар, нэһилиэккэ элбэх үтүөнү оҥорбут Агафья Петровнаҕа Амма нэһилиэгин Бочуотаах олохтооҕо ааты иҥэриллибитэ.
Библиотека күнүн көрсө Агафья Петровна кэргэнэ Наум Еремеевич Малышев, оҕолоро, сиэннэрэ полка оҥорон бэлэхтээтилэр. Кинилэр күндү ийэлэрин сырдык кэриэһигэр үлэлээбит тэрилтэтигэр көмөлөһөр сыаллаах 2019 с. өҥнөөх принтер бэлэхтээн үөрдүбүттэрэ. Бу сырыыга библиотекаҕа туох наадатын сураһан, биир дойдулаахпыт, народнай худуоһунньук, скульптор М.М. Павлов бэлэхтээбит кинигэлэригэр полка наада диэн буолбутугар, эскиһин көрдөөн, Агафья Петровна уола, билигин Нам улууһугар олохсуйан олорор Еримей Наумович олус тупсаҕай гына оҥорон ыытта. Ону бырааттара Павел Андреевич Егоров уолунаан Дьулустаанныын аҕалан туруоран биэрдилэр. Ис сүрэхтэн оҥоһуллубут күндү бэлэххит, ийэҕит, эбэҕит Агафья Петровна үтүө аатын үйэтитэр сырдык санааҕыт иһин Наум Еремеевичка, маастардаан оҥорбут Еримей Наумовичка, Октябрина Наумовнаҕа, Павел Андреевичка, кинилэр дьиэ кэргэттэригэр улахан махталбытын тиэрдэбит! Эһиэхэ чэгиэн доруобуйаны, үтүмэн үөрүүнү, дьолу- соргуну, этэҥҥэ буолууну баҕарабыт!
Comments